অসমৰ জ্যেষ্ঠ IPS বিষয়া সংযুক্তা পৰাশৰৰ কৰ্মজীৱনত সংযোজন হ’ল আন এক গুৰুত্বপূৰ্ণ অধ্যায়। কঠিন নিৰাপত্তাজনিত পৰিস্থিতিত নেতৃত্ব, উগ্ৰপন্থীবিৰোধী অভিযান আৰু ৰাষ্ট্ৰীয় নিৰাপত্তা সম্পৰ্কীয় তদন্তৰ অভিজ্ঞতাৰে সমৃদ্ধ এইগৰাকী বিষয়াই এইবাৰ লাভ কৰিছে Central Reserve Police Force (CRPF)ৰ বিশেষ বাহিনী CoBRAৰ Inspector General (IG)ৰ দায়িত্ব। এই দায়িত্ব লাভ কৰা প্ৰথমগৰাকী মহিলা IPS বিষয়া হিচাপে সংযুক্তা পৰাশৰে এক উল্লেখযোগ্য মাইলৰ খুঁটি স্থাপন কৰিছে। ২০০৬ বৰ্ষৰ অসম-মেঘালয় কেডাৰৰ IPS বিষয়া পৰাশৰৰ নতুন দায়িত্বক তেওঁৰ দীঘলীয়া আৰু বৈচিত্ৰ্যপূৰ্ণ কৰ্মজীৱনৰ আন এক গুৰুত্বপূৰ্ণ স্বীকৃতি হিচাপে দেখা হৈছে।

কি এই CoBRA?

CRPFৰ Commando Battalion for Resolute Action বা CoBRA হৈছে দেশৰ অন্যতম বিশেষায়িত সশস্ত্ৰ বাহিনী। জংঘল যুদ্ধ, গেৰিলা কৌশল, সন্ত্ৰাসবাদবিৰোধী অভিযান আৰু উগ্ৰপন্থীবিৰোধী অভিযানৰ বাবে এই বাহিনীৰ জোৱানসকলক বিশেষ প্ৰশিক্ষণ দিয়া হয়।বিশেষকৈ বাওঁপন্থী উগ্ৰবাদপ্ৰভাৱিত অঞ্চলত কঠিন ভূখণ্ড আৰু জটিল নিৰাপত্তাজনিত পৰিস্থিতিত CoBRA বাহিনী মোতায়েন কৰা হয়। শেহতীয়াকৈ মণিপুৰতো নিৰাপত্তাজনিত প্ৰত্যাহ্বানৰ প্ৰতি লক্ষ্য ৰাখি CoBRAৰ বেটেলিয়ন মোতায়েন কৰা হৈছে।এনে এটা বিশেষ বাহিনীৰ নেতৃত্বৰ দায়িত্ব লাভ কৰাটো সংযুক্তা পৰাশৰৰ কৰ্মজীৱনৰ বাবে বিশেষ তাৎপৰ্যপূৰ্ণ।

আৰক্ষী সেৱাত যোগদান কৰাৰ পূৰ্বৰে পৰা সংযুক্তা পৰাশৰৰ শৈক্ষিক যাত্ৰা আছিল যথেষ্ট শক্তিশালী। দিল্লী বিশ্ববিদ্যালয়ৰ ইন্দ্ৰপ্ৰস্থ কলেজ ফৰ অমেনৰ পৰা ৰাজনীতি বিজ্ঞানত অধ্যয়ন কৰাৰ পিছত তেওঁ জৱাহৰলাল নেহৰু বিশ্ববিদ্যালয়ৰ পৰা International Relationsত স্নাতকোত্তৰ ডিগ্ৰী লাভ কৰে। ইয়াৰ পিছত তেওঁ আমেৰিকাৰ বৈদেশিক নীতিৰ ওপৰত MPhil আৰু PhD সম্পূৰ্ণ কৰে। ২০০৬ চনৰ অসামৰিক সেৱাৰ পৰীক্ষাত সৰ্বভাৰতীয় ৮৫ নম্বৰ স্থান লাভ কৰি তেওঁ IASৰ পৰিৱৰ্তে IPS বাছনি কৰে।

সংযুক্তা পৰাশৰৰ কৰ্মজীৱনৰ আৰম্ভণিৰ সময়ছোৱাতেই তেওঁ অসমৰ কেইবাটাও প্ৰত্যাহ্বানপূৰ্ণ অঞ্চলত দায়িত্ব পালন কৰিছিল। ২০০৮ চনত মাকুমত সহকাৰী কমাণ্ডেণ্ট হিচাপে কৰ্মৰত হৈ তেওঁ ৰাজ্যখনৰ হিংসাত্মক সংঘাত নিয়ন্ত্ৰণৰ অভিযানত জড়িত হৈছিল। পৰৱৰ্তী সময়ত শোণিতপুৰৰ আৰক্ষী অধীক্ষক হিচাপে দায়িত্ব পালন কৰাৰ সময়ত তেওঁ উগ্ৰপন্থীবিৰোধী অভিযানত সক্ৰিয়ভাৱে নেতৃত্ব দিছিল।

শোণিতপুৰত দায়িত্ব পালন কৰাৰ সময়ছোৱাই সংযুক্তা পৰাশৰৰ কৰ্মজীৱনৰ অন্যতম চৰ্চিত অধ্যায় হিচাপে পৰিগণিত হয়। বিভিন্ন প্ৰতিবেদন অনুসৰি, তেওঁ পুৱতিনিশা AK-47 হাতত লৈ অসম আৰক্ষীৰ কমাণ্ডো আৰু CRPFৰ জোৱানৰ সৈতে জংঘলত অভিযানত অংশগ্ৰহণ কৰিছিল।National Democratic Front of Bodoland-Songbijit বা NDFB-S গোটৰ উগ্ৰপন্থীৰ বিৰুদ্ধে চলোৱা অভিযানতো তেওঁ নেতৃত্ব দিছিল। তেওঁৰ নেতৃত্বত চলোৱা বিভিন্ন অভিযানত উগ্ৰপন্থী গ্ৰেপ্তাৰ, সংঘৰ্ষ আৰু অস্ত্ৰ-শস্ত্ৰ উদ্ধাৰৰ তথ্য বিভিন্ন সময়ত প্ৰকাশ পাইছে। সেই সময়ছোৱাত তেওঁ উগ্ৰপন্থী সংগঠনৰ ভাবুকিৰো সন্মুখীন হৈছিল।

সংযুক্তা পৰাশৰৰ কৰ্মজীৱন কেৱল ক্ষেত্ৰভিত্তিক আৰক্ষী অভিযানতে সীমাবদ্ধ নাছিল। কেন্দ্ৰীয় ডেপুটেচনত National Investigation Agency (NIA)ত যোগদান কৰি তেওঁ সন্ত্ৰাসবাদবিৰোধী তদন্তৰ ক্ষেত্ৰতো অভিজ্ঞতা অৰ্জন কৰে।NIAৰ পৰা উভতি অহাৰ পিছত তেওঁ অসম আৰক্ষীৰ Criminal Investigation Department (CID)ত DIGP আৰু IGP হিচাপেও দায়িত্ব পালন কৰে। অৰ্থাৎ, ক্ষেত্ৰভিত্তিক আৰক্ষী অভিযানৰ পৰা আৰম্ভ কৰি উগ্ৰপন্থীবিৰোধী অভিযান, সন্ত্ৰাসবাদবিৰোধী তদন্ত আৰু ৰাষ্ট্ৰীয় নিৰাপত্তা সম্পৰ্কীয় দায়িত্বলৈকে সংযুক্তা পৰাশৰৰ কৰ্মজীৱনত বিভিন্ন ক্ষেত্ৰৰ অভিজ্ঞতা সঞ্চিত হৈছে।

দীৰ্ঘদিনীয়া আৰক্ষী সেৱাত বিভিন্ন কঠিন দায়িত্ব পালন কৰাৰ পিছত এতিয়া CoBRAৰ IG হিচাপে সংযুক্তা পৰাশৰৰ নতুন দায়িত্বই তেওঁৰ কৰ্মজীৱনত এক গুৰুত্বপূৰ্ণ সংযোজন ঘটাইছে।এগৰাকী মহিলা IPS বিষয়া হিচাপে দেশৰ অন্যতম বিশেষায়িত কমাণ্ডো বাহিনীৰ শীৰ্ষ নেতৃত্বৰ দায়িত্ব লাভ কৰাটো নিশ্চিতভাৱে তেওঁৰ কৰ্মজীৱনৰ এক উল্লেখযোগ্য অধ্যায়। অসমত উগ্ৰপন্থীবিৰোধী অভিযানৰ মাটিৰ অভিজ্ঞতাৰ পৰা ৰাষ্ট্ৰীয় পৰ্যায়ৰ তদন্ত আৰু নিৰাপত্তাজনিত দায়িত্বলৈকে বিস্তৃত তেওঁৰ অভিজ্ঞতাই এই নতুন ভূমিকাত বিশেষ প্ৰাসংগিকতা বহন কৰিছে।

সংযুক্তা পৰাশৰৰ এই নতুন দায়িত্বই কেৱল তেওঁৰ ব্যক্তিগত কৰ্মজীৱনতে নতুন অধ্যায়ৰ সূচনা কৰা নাই, অসমৰ এগৰাকী মহিলা IPS বিষয়াৰ ক্ষেত্ৰভিত্তিক সাহস, নেতৃত্ব আৰু পেছাদাৰী যাত্ৰাৰ কথাও পুনৰ চৰ্চালৈ আনিছে।