নাৰী অসীম শক্তি আৰু শক্তিৰ এক মহান উৎস । বছৰৰ পিছত বছৰ ধৰি সমগ্ৰ ভাৰতৰ পৰা শক্তিশালী, বুদ্ধিমান, দৃঢ়প্ৰতিজ্ঞ মহিলাই বিভিন্ন ক্ষেত্ৰত বিশ্বজুৰি নিজৰ স্থান দখল কৰি আহিছে আৰু তেওঁলোকৰ সাফল্যই দেশখনক সন্মান কঢ়িয়াই আনিছে ।  তাৰে ভিতৰত এনেদৰে ভাৰতক গৌৰৱান্বিত কৰা ভাৰতৰ প্ৰথমগৰাকী সাহসী মহিলা কমাণ্ডো প্ৰশিক্ষক ড সীমা ৰাওঁ ।

“Wonder Women Of India” নামে খ্যাত ডাঃ সীমা ৰাও মুম্বাইৰ বান্দ্ৰাত জন্মগ্ৰহণ কৰিছিল । তেওঁ হৈছে  গোৱাক পৰ্তুগীজৰ পৰা মুক্ত কৰাত সহায় কৰা স্বাধীনতা সংগ্ৰামী অধ্যাপক ৰমাকান্ত চিনাৰীৰ কন্যা । গভীৰ দেশপ্ৰেমী সীমা ৰাওঁ ভাৰতৰ স্বাধীনতা সংগ্ৰামৰ কাহিনী শুনি ডাঙৰ-দীঘল হৈছিল আৰু দেউতাকৰ দ্বাৰা অনুপ্ৰাণিত হৈ সদায় নিজৰ দেশৰ সেৱা কৰিব বিচাৰিছিল ।সৰুৰে পৰা বন্দুকবাজীত ৰাপ থকা সীমা ৰাওঁ ডাঙৰ হৈ এগৰাকী চিকিৎসক হোৱাৰ মন আছিল আৰু সেই উদ্দেশে তেওঁ G.S Medical college ৰ পৰা MD ৰ পঢ়া সম্পূৰ্ণ কৰি এগৰাকী চিকিৎসক হল । কিন্তু দেশক সেৱা কৰাৰ যি ইচ্ছা সেইয়া কেতিয়াও শেষ হৈ যোৱা নাছিল । অৱশেষত ১৯ বছৰ বয়সত তেওঁৰ স্বামী মেজৰ ডাঃ দীপক ৰাওঁক লগ পাই এই ইচ্ছাক বাস্তৱলৈ ৰূপান্তৰিত কৰাৰ সুযোগ পালে ।  মেজৰ ৰাওঁৱে ১২ বছৰ বয়সৰ পৰাই সমৰ কলাৰ অনুশীলন কৰি আহিছিল, তেওঁ কোৱাৰ বাবে সীমা ৰাওঁৱেও সমৰ কলাৰ অনুশীলন আৰম্ভ কৰিলে । আৰু তেওঁৱেই সীমাক এই শক্তিশালী ক্ষেত্ৰখনৰ সৈতে পৰিচয় কৰাই দিছিল । এই অবিশ্বাস্যভাৱে বহুমুখী ভদ্ৰমহিলাগৰাকী ১৯৬০ চনত ব্ৰুচ লীয়ে সৃষ্টি কৰা এক অনন্য সমৰ কলা জীত কুনে ড’ত প্ৰমাণিত হোৱা বিশ্বৰ ১০ গৰাকী মহিলাৰ ভিতৰত অন্যতম আছিল । তেওঁ ভাৰতীয় সেনা বাহিনীৰ এগৰাকী যুদ্ধক্ষেত্ৰৰ শ্বুটিং প্ৰশিক্ষক, অগ্নিনিৰ্বাপক বাহিনীৰ লোক, স্কুবা ডাইভাৰ, প্ৰস্তৰাৰোহনত এইচ এম আই পদক বিজয়ী, আৰু লগতে মিচেছ ইণ্ডিয়া ৱৰ্ল্ড প্ৰতিযোগিতাৰ চূড়ান্ত প্ৰতিযোগীও আছিল । 

বিবাহৰ পিছত দম্পতীহালে যুদ্ধ কলা, গুলীচালনা, অস্ত্ৰ প্ৰতিৰক্ষাৰ ক্ষেত্ৰত শিকিবলৈ পাৰদৰ্শিতা অব্যাহত ৰাখিছিল তাৰ পিছত দম্পতীহালে দেশৰ বাবে গঠনমূলক কিবা এটা কৰাৰ ইচ্ছাক তেওঁলোকে কেনেকৈ সাৰ্থক কৰিব পাৰে সেই বিষয়ে চিন্তা কৰিবলৈ আৰম্ভ কৰিলে । বহু চিন্তা কৰি তেওঁলোকে বিনিময়ত কোনো ধৰণৰ ক্ষতিপূৰণ গ্ৰহণ নকৰাকৈ ভাৰতীয় সশস্ত্ৰ বাহিনীৰ জোৱানসকলক প্ৰশিক্ষণ দিয়াৰ সিদ্ধান্ত লয় ।  দুটা কাৰকে তেওঁলোকক এই প্ৰত্যাহ্বান গ্ৰহণ কৰিবলৈ অনুপ্ৰাণিত কৰিছিল । এটা আছিল ভাৰতক পহৰা দিয়া কৰ্মীসকলক সেৱা আগবঢ়োৱাৰ ইচ্ছা আৰু আনটো আছিল তেওঁলোকৰ যুদ্ধ আৰু যুদ্ধ কলাৰ সৈতে জড়িত হৈ থকাৰ প্ৰবৃত্তিগত প্ৰয়োজনীয়তা । গতিকে, সেই উদ্দেশে ১৯৯৬ চনত তেওঁলোকে মিলি ভাৰতীয় সেনা, নৌবীহিনী, বি এছ এফ আৰু এন এছ জিৰ চাৰ্ভিচ চীফৰ ওচৰত ভাৰতীয় সশস্ত্ৰ বাহিনীৰ জোৱানসকলক বিনামূলীয়াকে সমৰ কলা আৰু কম্বেট প্ৰশিক্ষন দিয়াৰ বাবে প্ৰস্তাৱ ৰাখিছিল । দম্পতীহালৰ এই প্ৰস্তাৱত আপ্লুত হৈ  তেওঁলোকৰ প্ৰশিক্ষণ কাৰ্যসূচীৰ সিদ্ধান্তক সন্মতি দিয়ে । তাৰ পিছৰ পৰাই সীমা ৰাওঁ  পিছলৈ ঘূৰি চোৱা নাছিল । শক্তি আৰু দৃঢ়তাৰ প্ৰতিমূৰ্তি  ডাঃ সীমা ৰাওঁৱে জীৱনৰ ২৩ বছৰ কাল ভাৰতীয় সশস্ত্ৰ বাহিনী, অৰ্ধসামৰিক আৰু আৰক্ষীৰ ১৫ হাজাৰ জোৱানক কোনো ধৰণৰ ক্ষতিপূৰণ নোলোৱাকৈ প্ৰশিক্ষণ দি আহিছে । তেওঁ আৰু তেওঁৰ স্বামী ড০ দীপক ৰাওৱে একেলগে ক্ল’জ-কোৱাৰ্টাৰ বেটলত কৰা কামৰ বাবে তিনিটা সেনা প্ৰধানৰ প্ৰশংসাপত্ৰ লাভ কৰে । স্বামীৰ সৈতে তেওঁ ভাৰতীয় বাহিনীৰ প্ৰায় প্ৰতিটো অভিজাত শাখাক প্ৰশিক্ষণ প্ৰদান কৰিছে, য’ত আছে এন এছ জি ব্লেক কেটছ, মাৰ্ক’ছ, পেৰাকমাণ্ডো, বি এছ এফ, সেনাবাহিনীৰ যুদ্ধ বিদ্যালয় আৰু ইয়াৰ কমাণ্ডো উইং । ভাৰতৰ প্ৰায় প্ৰতিখন ডাঙৰ চহৰৰ ৰাষ্ট্ৰীয় আৰক্ষী একাডেমী, আৰক্ষী কুইক ৰেচপন্স টীমৰ বিষয়াসকল, সেনা বিষয়া প্ৰশিক্ষণ একাডেমীক প্ৰশিক্ষণ দিয়ে ।

যাত্ৰাটো সহজ নাছিল । বিবাহৰ প্ৰাৰম্ভিক বছৰবোৰত দম্পতীহালে কেইবাটাও আৰ্থিক কষ্টৰ সন্মুখীন হ’বলগীয়া হৈছিল যদিও তেওঁলোকে নিজৰ কামৰ বাবে এটকাও নোলোৱাৰ সিদ্ধান্তত অটল হৈ থাকিল । লগতে, যিহেতু তেওঁ অহৰহ শত্ৰুতাপূৰ্ণ স্থানলৈ, অনাতিথ্যপূৰ্ণ ভূখণ্ডৰ মাজেৰে যাত্ৰা কৰি আছিল, সেয়েহে তাই দেউতাকৰ অন্ত্যেষ্টিক্ৰিয়াতো উপস্থিত থাকিব নোৱাৰিলে । কামৰ কালছোৱাত সীমাইও একাধিক আঘাতৰ সন্মুখীন হৈছিল য’ত তেওঁ নিজৰ মেৰুদণ্ডৰ হাড়ভঙা বাবে আৰু মূৰৰ গুৰুতৰ আঘাতৰ বাবে মাহৰ পিছত মাহ ধৰি স্মৃতিশক্তি হেৰুৱাই পেলাইছিল আৰু স্বামীৰ বাহিৰে আন কাকো চিনিব পৰা নাছিল । তেওঁক বিদ্ৰোহীয়েও গুলীয়াই হত্যা কৰিব বিচাৰিছিল যদিও দেশৰ সেৱাৰ বাবে তেওঁৰ সংকল্প কেতিয়াও দোলা নাছিল ।

সীমা ৰাওঁক ভাৰত চৰকাৰে আজিলৈকে নিযুক্তি দিয়া একমাত্ৰ বাহ্যিক যুদ্ধ প্ৰশিক্ষণ সম্পদ আৰু স্বামীৰ সৈতে তেওঁ ৪টা সেনাধ্যক্ষৰ উদ্ধৃতি লাভ কৰিছে, যিটো অতুলনীয় । তেওঁৰ শক্তি নিহিত হৈ আছে ক্ল’জ কোৱাৰ্টাৰ যুদ্ধ (CQB)ত যিটোয়ে শাৰীৰিক দক্ষতা, আৰু প্ৰট’কলৰ ওপৰত গুৰুত্ব আৰোপ কৰে । ইয়াত ৰাইফলৰ সহায়ত ৰিফ্লেক্স শ্বুটিং, পিষ্টলৰ সহায়ত দ্ৰুত শ্বুটিং, খালী হাতেৰে যুদ্ধ আদি কৌশল জড়িত হৈ আছে। সীমা আৰু তেওঁৰ স্বামীয়েও একান্তভাৱে ভাৰতীয় শক্তিৰ ব্যৱহাৰৰ বাবে এক অনন্য আৰু আধুনিক পদ্ধতি উদ্ভাৱন কৰিছে । সীমা ৰাওঁ এগৰাকী কমাণ্ডো প্ৰশিক্ষক হোৱাৰ লগতে এগৰাকী ভাল লেখিকাও । তেওঁ লিখা কেইখনমান কিতাপ হৈছে – “The Art of Success”,  “Beyond Defensiveness: A workbook to be a better Ally, Change at Work:Not Just Surviving but Thriving, Forces Handbook of World Terrorism.

সীমাই মহিলাৰ সুৰক্ষাৰ প্ৰতি বিশেষভাৱে তৈয়াৰ কৰা এটা কাৰ্যসূচী ৰূপাংকন কৰিছে যাতে তেওঁলোকক হাৰাশাস্তি, নিৰ্যাতন, যৌন নিৰ্যাতন, আৰু ধৰ্ষণৰ সৈতে মোকাবিলা কৰাত সহায় কৰে । DARE (Defence Against Rape and Eve Teasing) নামৰ এই কাৰ্যসূচীয়ে মহিলাসকলক মানসিক আৰু শাৰীৰিক উভয়ভাৱে সম্ভাৱ্য ইভ টিজাৰ, নিৰ্যাতনকাৰী, আৰু অন্যান্য যৌন নিৰ্যাতনৰ ফলত সৃষ্টি হোৱা প্ৰতিকূল পৰিস্থিতিৰ সন্মুখীন হ’বলৈ সজ্জিত কৰে । এগৰাকী মহিলা নায়িকাক কেন্দ্ৰ কৰি ভাৰতৰ প্ৰথমখন সমৰ কলাৰ চিনেমা হাথাপায়ীত প্ৰযোজনা আৰু অভিনয় কৰিছে । এই চিনেমাখনত ভাৰতীয় চিনেমাত প্ৰথমবাৰৰ বাবে জীত কুনে ডোৰ যুদ্ধ কলাক চিত্ৰিত কৰা হৈছে ।

সীমাই ১৫ হাজাৰতকৈ অধিক জোৱানক আধুনিক ক্ল’জ কোৱাৰ্টাৰ যুদ্ধৰ প্ৰশিক্ষণ দিছে । ড০ ৰাওৱে জম্মু-কাশ্মীৰতো সন্ত্ৰাসবাদী সন্মুখীন  হ’বলগীয়া হৈছিল আৰু গুলীচালনাৰ পৰা সংকীৰ্ণভাৱে ৰক্ষা পৰিছিল । সশস্ত্ৰ বাহিনীৰ বহু প্ৰশিক্ষাৰ্থীও তেওঁৰ প্ৰকৃত নামটোৰ বিষয়ে অজ্ঞাত আছিল ।সীমা ৰাওঁক তেওঁৰ এই সাহসীকতা আৰু দেশপ্ৰেমৰ বাবে নাৰী শক্তি পুৰস্কাৰেৰে সন্মানিত কৰিছিল । সাধাৰণ নাগৰিকে যে নিজৰ দেশৰ বাবে অসাধাৰণ কাম কৰিব পাৰে আৰু এগৰাকী নাৰীয়ে  যিকোনো কাম কৰিব পাৰে বুলি ডাঃ সীমা ৰাওঁয়ে প্ৰমাণ কৰি দিছে । এইগৰাকী সাহসী আৰু দেশপ্ৰেমী নাৰী চিৰজীৱন আমাৰ প্ৰেৰণা হৈ ৰব ।