'নাৰীবাদ' শব্দটো কিছুমানৰ বাবে এটা বিভ্ৰান্তিকৰ অথবা অৰ্থহীন শব্দ হ'ব পাৰে। বহুলোকে ভাবে, নাৰীবাদৰ অৰ্থ হৈছে পুৰুষক ঘৃণা কৰা বা মহিলাসকলে সকলোবোৰৰ ওপৰত শাসন কৰিব বিচাৰে! কিন্তু নাৰীবাদৰ প্ৰকৃত অৰ্থ হৈছে পুৰুষ আৰু মহিলা সমান বুলি বিশ্বাস কৰা, এটাক আনটোতকৈ অধিক গুৰুত্ব দিয়াটো উচিত নহয়। সকলো স্তৰতে সমান হ'ব লাগে পুৰুষ আৰু নাৰী। নাৰীবাদ হৈছে এক আন্দোলন যিয়ে বিভিন্ন ধৰণৰ প্ৰতিকূল পৰিস্থিতিৰ সন্মুখীন হোৱা মহিলাসকলৰ বাবে যুঁজ দিয়ে। কিন্তু ই লিংগ অন্তৰ্ভুক্তি আৰু সমতাৰ পথো প্ৰশস্ত কৰি আছে যিয়ে সামগ্ৰিকভাৱে সমাজক লাভান্বিত কৰে। নাৰীবাদ হৈছে মানুহক সমৰ্থন আৰু সৱলীকৰণ কৰা এটা পদ্ধতি, যিটো এতিয়াৰ সময়তো যথেষ্ট প্ৰয়োজনীয়।

নাৰীবাদ কিয় গুৰুত্বপূৰ্ণ?

নাৰীবাদে দুয়োটা লিংগৰ বাবে সমান সুযোগ প্ৰদান কৰে। লিংগ ভূমিকা (এজন ব্যক্তিয়ে তেওঁলোকৰ লিংগৰ ওপৰত আধাৰিত কৰি কেনে আচৰণ কৰিব লাগে বুলি কোৱা নিয়মৰ এক সংহতি) পুৰুষ আৰু মহিলা দুয়োৰে বাবে ক্ষতিকাৰক হ'ব পাৰে। জনবিশ্বাস আছে যে মহিলা আৰু ছোৱালীবোৰ ঘৰৰ যত্ন লোৱাৰ বাবে হয় আনহাতে ল'ৰা আৰু পুৰুষসকলে বাহিৰলৈ গৈ পৰিয়ালৰ ভৰণপোষণ কৰিব লাগে। আপুনি কেৱল ছোৱালী হোৱাৰ বাবে বিদ্যালয়লৈ যাবলৈ অনুমতি নিদিয়াৰ কল্পনা কৰিব পাৰিবনে? বা আপুনি কল্পনা কৰিব পাৰিব নে এগৰাকী মহিলা হোৱাৰ বাবে ঘৰত থাকিবলৈ আৰু ঘৰৰ চোৱাচিতা কৰিবলৈ বাধ্য কৰাৰ কথা? আনকি দক্ষিণ আফ্ৰিকাতো বহুতো ছোৱালীয়ে এই বাস্তৱতাৰ সন্মুখীন হৈছে। তেওঁলোকক কেৱল তেওঁলোকৰ লিংগৰ ওপৰত আধাৰিত কৰি সীমাবদ্ধ কৰি ৰখা হয়। ল'ৰাবোৰৰ লিংগৰ ওপৰত আধাৰিত কিছুমান ভূমিকা পালন কৰিবলৈ হেঁচা দিয়াটোও অন্যায়। নাৰীবাদ হৈছে ল'ৰা আৰু ছোৱালী দুয়োকে তেওঁলোকে বিচৰা কাম কৰাৰ স্বাধীনতা দিয়া আৰু নিশ্চিত কৰা যাতে মানুহে ঘৰত, বিদ্যালয়ত হওঁক, কৰ্মস্থানত অথবা সংসদতে হওঁক, লিংগ ভূমিকা আৰু প্ৰত্যাশাৰ দ্বাৰা পিছুৱাই নাথাকে।  

নাৰীত্ব আৰু নাৰীবাদ

নাৰীবাদী হোৱাৰ অৰ্থ এইটো নহয় যে আপুনি নিজৰ অস্তিত্বক সলনি কৰিব লাগিব। নাৰীবাদী হৈ থাকিও আপুনি এতিয়াও আপোনাৰ নাৰীত্ব উপভোগ কৰিব পাৰে। আপুনি কেনেদৰে পোছাক পিন্ধে বা আপুনি কিমান প্ৰসাধন সানে তাৰ সৈতে নাৰীবাদৰ কোনো সম্পৰ্ক নাই। কিন্তু পুৰুষসকলৰ সৈতে সমঅধিকাৰৰ বাবে চেষ্টা কৰাৰ সৈতে ইয়াৰ সম্পূৰ্ণ সম্পৰ্ক আছে। নাৰীবাদৰ লিংগ অথবা যৌনতাৰ সৈতেও কোনো সম্পৰ্ক নাই। আপুনি এজন পুৰুষ হ'ব পাৰে আৰু নাৰীবাদীও হ'ব পাৰে। নাৰীবাদে পুৰুষক অৱনমিত বা উপেক্ষা কৰিব নিশিকায়। যেতিয়ালৈকে আপুনি বিশ্বাস কৰে, পুৰুষ আৰু মহিলা দুয়োকে সমান সুযোগ দিয়া উচিত, তেতিয়ালৈকে আপুনি নাৰীবাদত বিশ্বাস কৰে।

কৰবাত পঢ়িবলৈ পাইছিলো, "যদি আপুনি এনে এজন পুৰুষ যি বিশ্বাস কৰে যে আপোনাৰ ছোৱালীৰ ওচৰত আপোনাৰ পুত্ৰৰ দৰে একে সুযোগ আৰু অধিকাৰ থাকিব লাগে, তেন্তে আপুনি নাৰীবাদী" আৰু "যদি আমি ছোৱালীবোৰক তেওঁলোকৰ আৱেগ আৰু দুৰ্বলতা দেখুৱাবলৈ দিওঁ, তেন্তে আমি ল'ৰাবোৰক একেই অনুমতি দিব লাগিব। পুৰুষ-মহিলা উভয়কে একে দায়িত্ব দিব লাগে আৰু সমান প্ৰত্যাহ্বানৰ মোকাবিলা কৰিবলৈ শিকাব লাগে যাতে দুয়োপক্ষই বিচৰা সকলোবোৰ প্ৰাপ্ত কৰিবলৈ সক্ষম হয়। আমি পুৰুষ আৰু মহিলাৰ চাকৰিৰ শ্ৰেণীবিভাজন কৰিহবলৈ বন্ধ কৰিব লাগিব। আগে-পিছে দেখিছোঁ পুৰুষসকলেও কিমান সুন্দৰভাৱে শিশুৰ যত্ন ল'ব পাৰে, ঠিক যিদৰে মহিলাসকল কোম্পানীএটাৰ মুখ্য কাৰ্যবাহী বিষয়াৰ গুৰুত্বপূৰ্ণ দায়িত্ব গ্ৰহণ কৰিব পাৰে। পুৰুষৰ বাবে যিবোৰ সুযোগ উপলব্ধ, মহিলাসকলৰ বাবেও সেই সুযোগ সমানে থাকিব লাগে। কিন্তু সকলো কামৰ মাজতো কিছুমান কাম থাকে য’ত পুৰুষ-মহিলাৰ শাৰীৰিক গঠন অনুসৰি কৰা হয়, তাত কোনো অন্য যুক্তি হয়তো থাকিব নোৱাৰে। নাৰীবাদক এক ভয়ংকৰ শব্দ হিচাপে চোৱাতো উচিত নহয়। প্ৰায়ে, নাৰীবাদক "নাৰী আন্দোলন" বুলি ভুল কৰা হয় কিয়নো ই ‘নাৰী’ শব্দটোৰ পৰা উদ্ভৱ হয়। কিন্তু, আমি উপলব্ধি কৰাটো অতি প্ৰয়োজনীয়, নাৰীবাদ কেৱল এক নাৰী আন্দোলন নহয়, ই হৈছে "সকলো মানুহৰ বাবে আন্দোলন", যি পুৰুষ আৰু মহিলা উভয়তে মুক্তিৰ সৈতে সম্পৰ্কিত। অৱশ্যে, এইটোও গুৰুত্বপূৰ্ণ বিষয় বুলি আমি এইটোও স্বীকাৰ কৰোঁ যে মহিলাসকল বহু বছৰধৰি পিতৃতান্ত্ৰিকতা আৰু বিষাক্ত পুৰুষত্বৰ মুখ্য ভুক্তভোগী হৈ আহিছে। এতিয়াও তাৰ বহু উদাহৰণ সকলোতে পোৱা যায়। নাৰীবাদ হৈছে আধিপত্য আৰু অধীনতাৰ এই ধাৰণাৰ পৰা পৰিত্ৰাণ পাবলৈ, দুয়োটা লিংগক একে স্তৰত অনাৰ এক প্ৰয়াস। ইয়াৰ অৰ্থ যিমান সোনকালে সকলোৱে সম্পূৰ্ণৰূপে বুজি পাব, পুৰুষ আৰু মহিলা দুয়োপক্ষৰ বাবে সমান সুযোগ উপলব্ধ কৰাৰ দিশত আমাৰ প্ৰচেষ্টা সিমানেই সহজ হ'ব।

ভাৰতৰ দৰে এখন দেশৰ বাবে নাৰীবাদ কিয় ইমান গুৰুত্বপূৰ্ণ এই বিষয়ে অনুমান কৰিবলৈ নিম্নোক্ত কথাখিনিত উল্লেখ কৰা হৈছেঃ

১) ধৰ্ষণ সংস্কৃতিৰ সমাপ্তি কৰাঃ

ধৰ্ষণৰ ক্ষেত্ৰত মহিলা আৰু ছোৱালী আটাইতকৈ বেছি অসুৰক্ষিত। এইটো এনে এক পৰ্যায়লৈ গৈছে যে নিশা অকলে খোজ কাঢ়ি থকা এগৰাকী মহিলা ধৰ্ষণৰ সন্মুখীন হ'ব পাৰে বুলি ভয় কৰা হয় আৰু পৃথিৱীৰ বহু ঠাইত ধৰ্ষণক গুৰুতৰ অপৰাধ হিচাপেও দেখা নাযায়। যেতিয়া এগৰাকী মহিলাক ধৰ্ষণ কৰা হয়, আমি কিমান বাৰ ভুক্তভোগীৰ ওপৰত দোষ দিয়া শুনিছোঁ, কিন্তু অপৰাধীৰ ওপৰত শুনো নে? মহিলাসকলক সোধা হয় যে তেওঁলোকে কি পিন্ধিছিল বা ধৰ্ষণৰ সময়ত তেওঁলোকে সুৰাপান কৰিছিল নেকি। এইটো কেতিয়াও ধৰ্ষণৰ ভুক্তভোগীৰ দোষ নহয়! নাৰীবাদ হৈছে সকলোৰে শৰীৰ উলংঘন নকৰাৰ অধিকাৰ সুৰক্ষিত কৰা। নাৰীবাদ হৈছে আনক ধৰ্ষণ নকৰিবলৈ শিকোৱা আৰু ধৰ্ষণৰ বাবে ভূক্তভোগী মানুহক দোষ নিদিয়া। নাৰীবাদ হৈছে ধৰ্ষণ সংস্কৃতিৰ সমাপ্তি আৰু এনে এখন পৃথিৱীৰ গঢ়িবৰ বাবে চেষ্টা কৰা য'ত কোনেও যৌন নিৰ্যাতনৰ সন্মূখীন হ’ব বুলি ভয় কৰিব নালাগে। 

২) মহিলাসকলক পুৰুষৰ আধিপত্যৰ পৰা মুক্ত কৰাঃ

ভাৰতত নাৰীবাদৰ প্ৰয়োজন কিয়নো এগৰাকী মহিলাক গোটেই জীৱন পুৰুষৰ দায়িত্ব বুলি গণ্য কৰিব নালাগে, সেয়া লাগিলে তেওঁৰ পিতৃ, ভাতৃ, স্বামী বা পুত্ৰ হওঁক। 'কন্যাদন', 'ৰক্ষা বন্ধন' আৰু 'পৰ্দা প্ৰণালী'ৰ দৰে প্ৰথা আছে য'ত এগৰাকী মহিলাক উৰনিৰ তলত আৱৰি ৰখা হয়, পুৰুষৰ আধিপত্যৰ পৰিমাণ কঢ়িয়াই আনে। এই প্ৰথাবোৰে গুৰুত্ব দিয়ে যে শক্তিশালী, সক্ষম পুৰুষে দুৰ্বল, ভঙ্গুৰ মহিলাসকলক সুৰক্ষা দিব লাগিব আৰু মহিলাসকল নিজকে সুৰক্ষা দিয়াৰ বাবে প্ৰস্তুত নহয় তেওঁলোকক সুৰক্ষিত কৰিব লাগিব।

৩) লিংগৰ সমতা বৃদ্ধি কৰাঃ

ভাৰতত নাৰীবাদ প্ৰয়োজনীয় কিয়নো এগৰাকী মহিলা বোজা নহয় আৰু বিবাহ তেওঁৰ অস্তিত্বৰ একমাত্ৰ কাৰণ হ'ব নালাগে। প্ৰতি বছৰে ২ লাখতকৈও অধিক ছোৱালীক এই পৃথিৱীত ভৰি দিয়াৰ আগতেই হত্যা কৰা হয় আৰু যৌতুক নিৰ্যাতনৰ ফলত হাজাৰ হাজাৰ মহিলাৰ মৃত্যু হয়। বহুতো ভাৰতীয় পৰিয়ালত, পুৰুষ আৰু মহিলাক বেলেগ ধৰণে ব্যৱহাৰ কৰা হয়; শিক্ষাৰ লগতে ল'ৰাৰ বাবে পুষ্টিক প্ৰাথমিকতা দিয়া হয়, আনহাতে ছোৱালীজনীৰ পুষ্টি অৱহেলিত হয়। বহুতো ভাৰতীয় পৰিয়ালৰ মহিলাই তেওঁলোকৰ পৰিয়ালৰ আন সকলো সদস্যক সেৱা আগবঢ়োৱাৰ পিছত শেষত আৰু আটাইতকৈ কম খায়। এই বৈষম্য চৰকাৰে প্ৰকাশ কৰা পৰিসংখ্যাত প্ৰতিফলিত হয়, য'ত কোৱা হৈছে যে প্ৰায় ৫০ শতাংশ ভাৰতীয় কিশোৰী তথা মহিলাৰ ওজন কম আৰু ৫২ শতাংশ ৰক্তহীনতাত ভূগিব লগা হৈছে।

যিসকল মহিলাই তেওঁলোকৰ কেৰিয়াৰ অব্যাহত ৰখাৰ বাবে তেওঁলোকৰ সন্তানক সম্পূৰ্ণ সময়ডাঙৰ কৰিবলৈ বাছনি কৰে তেওঁলোকক সমালোচনা কৰা হয়। কিন্তু গুৰুত্বপূৰ্ণ কথাটো হ'ল এইটো উপলব্ধি কৰা যে কেৱল এগৰাকী মহিলাই উপাৰ্জন নকৰাৰ অৰ্থ এইটো নহয় যে তেওঁৰ কাম কম গুৰুত্বপূৰ্ণ। কিছুমান গৱেষণাই এইটোও আঙুলিয়াই দিছে যে কেনেকৈ গৃহিণী হোৱাটো ২.৫ টা চাকৰি কৰাৰ সমান। সেয়েহে, এটা বৃত্তিয়ে আগবঢ়োৱা ধনৰ পৰিমাণৰ ওপৰত ভিত্তি কৰি গুৰুত্বপূৰ্ণ বুলি গণ্য কৰিব নালাগে কিন্তু ইয়াৰ মূল্যৰ পৰিমাণৰ ওপৰত আধাৰিত কৰি কৰিব লাগে।

ভাৰতক নাৰীবাদৰ প্ৰয়োজন কিয়নো এগৰাকী মহিলাই একেটা কাম কৰাৰ বাবে পুৰুষৰ দৰে একে পৰিমাণৰ ধন আৰু সন্মানৰ যোগ্য। ভাৰতত কৰ্মৰত মহিলাসকলে তেওঁলোকৰ পুৰুষ সহকৰ্মীসকলে একে পৰিমাণৰ কামৰ বাবে উপাৰ্জন কৰা উপাৰ্জনৰ মাত্ৰ ৬৬ শতাংশ উপাৰ্জন কৰে। এই লিংগৰ ওপৰত আধাৰিত দৰমহাৰ ব্যৱধান আৰু সুযোগৰ বৈষম্যই মহিলাসকলক পেছাদাৰী ক্ষেত্ৰত ভাল প্ৰদৰ্শন কৰাৰ পৰা নিৰুৎসাহিত কৰে। এক প্ৰতিবেদন অনুসৰি মহিলাৰ নিযুক্তিৰ হাৰ অধিক হ'লে ভাৰত ২৭ শতাংশ ধনী হ'ব। গ্লাছ চিলিঙৰ প্ৰভাৱ ভাৰতত আছে, যাৰ অৰ্থ হৈছে এক অদৃশ্য বাধা আছে যি মহিলাসকলক নিগম এটাত উচ্চ স্থান পোৱাত বাধা দিয়ে। ভাৰতত, মহিলাসকলে ফাৰ্মবোৰত কেৱল ১১.২ শতাংশ ব'ৰ্ডৰ সদস্য গঠন কৰে যি বিশ্বব্যাপী গড়তকৈ কম। আমি নৱ নিৰ্বাচিত সপ্তদশ লোকসভাত একেই প্ৰৱণতা দেখিবলৈ পাওঁ য'ত মাত্ৰ ১৪ শতাংশ সদস্যহে মহিলা।

৪) ঋতুস্ৰাৱৰ নিষিদ্ধতা ভংগ কৰাঃ

ভাৰতত নাৰীবাদৰ প্ৰয়োজন কিয়নো ইয়াত ঋতুস্ৰাৱৰ দৰে প্ৰাকৃতিক প্ৰক্ৰিয়া এটাৰ বিশুদ্ধতাক বদনাম কৰা হয় আৰু ইয়াক উল্লেখ কৰিব নোৱাৰা বস্তুলৈ পৰিৱৰ্তন কৰিছোঁ। কিছুমান ভাৰতীয় মহিলাক তেওঁলোকৰ ঋতুস্ৰাৱত অস্পৃশ্য বুলি গণ্য কৰা হয়। তেওঁলোকক পাকঘৰত প্ৰৱেশ কৰিবলৈ অনুমতি দিয়া নহয়, মজিয়াত শুবলৈ বাধ্য কৰা হয়; তেওঁলোকক স্পৰ্শ কৰিব নোৱাৰি, কথা পাতিব নোৱাৰি, আনৰ সৈতে একেখন মেজ ভাগ বতৰা কৰিব নোৱাৰে।

ইয়াৰ সৈতে জড়িত কলঙ্কৰ বাবে, ঋতুস্ৰাৱ সুৰক্ষাৰ পদ্ধতিবোৰৰ বিষয়ে সজাগতাৰ অভাৱ দেখা যায়। তথ্যই পৰামৰ্শ দিয়ে যে প্ৰায় ৪৬ শতাংশ মহিলাই ঋতুস্ৰাৱ সুৰক্ষাৰ স্বাস্থ্যকৰ পদ্ধতি ব্যৱহাৰ নকৰে আৰু ৩৬ শতাংশই সেইবোৰ চাৰিওফালে থকা আন গ্ৰাহকৰ সৈতে ক্ৰয় কৰাত অস্বস্তি অনুভৱ কৰে। ভাৰত "পিৰিয়ড দৰিদ্ৰতা"ত ভূগি আছে কিয়নো ঋতুস্ৰাৱৰ জনসংখ্যা পূৰণ কৰাৰ বাবে আমাৰ পৰ্যাপ্ত পৰিচ্ছন্ন সামগ্ৰীৰ অভাৱ আছে। আন এটা কথাত পোহৰলৈ আহে ভণ্ডামি, য'ত এফালে আমি কামাখ্যা দেৱীক উপাসনা কৰা হয়, যি দেৱীৰ ৰক্তক্ষৰণৰ সময়ত মেলা পতা হয়, পূজা কৰা হয়, আৰু আনফালে মহিলাসকলক তেওঁলোকৰ ঋতুস্ৰাৱৰ সময়ত মন্দিৰত প্ৰৱেশ কৰা বা অন্য প্ৰয়োজনীয় কামত বাধা দিওঁ।

৫) লিংগ ভূমিকাৰ বিষয়ে ভিত্তিহীন ষ্টেৰিওটাইপবোৰ সমাপ্ত কৰাঃ

ভাৰতক নাৰীবাদৰ প্ৰয়োজন কিয়নো বৃত্তি আৰু পাৰিবাৰিক ভূমিকাও লিংগৰ ওপৰত আধাৰিত কৰি ষ্টেৰিওটাইপ কৰা হৈছে। উদাহৰণ স্বৰূপে, অভিযান্ত্ৰিক, বিমান চলাচল আৰু সামৰিক বাহিনীৰ দৰে বৃত্তিবোৰক পুৰুষত্বপূৰ্ণ বুলি গণ্য কৰা হয় (বৰ্তমান এইক্ষেত্ৰত যথেষ্ট উন্নতি হোৱা দেখা যায়) আৰু শিকোৱা, ফেশ্বন ডিজাইনিং, আৰু গৃহ নিৰ্মাণৰ দৰে বৃত্তিবোৰক নাৰীসুলভ বুলি গণ্য কৰা হয়। পাৰিবাৰিক ভূমিকাত ষ্টেৰিওটাইপিং অন্তৰ্ভুক্ত থাকে যেতিয়া ভবা হয়, পুৰুষসকল এটা পৰিয়ালৰ একমাত্ৰ উপাৰ্জনকাৰী হ'ব আৰু মহিলাসকলে ঘৰখন পৰিচালনা কৰাৰ দায়িত্ব এককভাৱে গ্ৰহণ কৰিব। ভাৰতে ৰাণী পদ্মাৱতী, ৰাজিয়া চুলতানা আৰু ৰাণী অহল্যাবাই হোলকাৰৰ দৰে মহান মহিলা যোদ্ধা প্ৰস্তুত কৰাৰ বাবে গৌৰৱান্বিত, তথাপিও ভাৰতীয় প্ৰতিৰক্ষা বাহিনীত মহিলাৰ অংশগ্ৰহণ হতাশাজনক। সেনাবাহিনীত পুৰুষ আৰু মহিলাৰ সমান জড়িত হোৱাটো এতিয়াও এক দূৰৈৰ সপোন। ই কেৱল পুৰুষত্বই শাৰীৰিক শক্তি আৰু নাৰীত্ব, আৱেগিকতা বুজায় বুলি ধাৰণাটো সমৰ্থন কৰে।

৬) পুৰুষসকলে মহিলাতকৈ শক্তিশালী হোৱাৰ প্ৰয়োজনীয় ধাৰণাটো শেষ কৰাঃ

ভাৰতত নাৰীবাদৰ প্ৰয়োজন কিয়নো কোনো পুৰুষ এগৰাকী মহিলাতকৈ আৱেগিক আৰু শাৰীৰিকভাৱে শক্তিশালী হোৱাৰ চাপত থাকিব নালাগে। এয়াই সময়, "পুৰুষৰ কষ্ট নহয়" আৰু "পুৰুষে কান্দিব নাপাই"ৰ দৰে মন্তব্যবোৰ কঠোৰ ভাৱে আঁতৰাই পেলোৱা আৰু ঘৰত দায়িত্ব লোৱাৰ বাবে স্বেচ্ছাসেৱী হোৱাৰ বাবে পুৰুষসকলক যাতে উপহাস কৰা নহয়।

৭) মহিলাসকলক কেনেকৈ পোছাক পিন্ধিব লাগে কোৱা বন্ধ কৰাঃ

ভাৰতত নাৰীবাদৰ প্ৰয়োজন কিয়নো ছোৱালীসকলক তেওঁলোকৰ পোছাক পচন্দৰ বাবে পৰিহাৰ কৰা হয়। কেইবাটাও অযুক্তিকৰ উদাহৰণ আছে য'ত মহিলা চেলিব্ৰিটিসকলৰ বিৰুদ্ধে পশ্চিমীয়া কাপোৰ পিন্ধাৰ বাবে ফতোয়া জাৰি কৰা হৈছে, তাৰে এটা শাৰী পিন্ধাৰ বাবেও। এনে ধৰণৰ আন এটা ভয়ংকৰ ঘটনা সংঘটিত হৈছিল যেতিয়া এজন বিশিষ্ট ৰাজনীতিবিদে অশালীন কাপোৰক ধৰ্ষণৰ নিমন্ত্ৰণৰ সৈতে তুলনা কৰিছিল। অবিবেচক হোৱাটছএপ ফৰৱাৰ্ড আৰু মিছ'জিনিষ্টিক ধাৰাবাহিক আৰু চিনেমাত ইভ-টিজিং স্বাভাৱিক কৰা ইত্যাদিয়ে পৰিস্থিতিৰ অৱনতি ঘটায়।

এইটোৱে সময় য’ত আমি স্বীকাৰ কৰোঁ যে নাৰীবাদ মহিলাসকলক শক্তিশালী কৰাৰ বিষয়ে নহয়। মহিলাসকল ইতিমধ্যে শক্তিশালী। এইখন পৃথিৱীয়ে এই শক্তিক অনুভৱ কৰাৰ ধৰণ সলনি কৰিব লাগে। কোনেও নিজকে নাৰীবাদী বুলি কোৱাত ভয় কৰিব নালাগে কিয়নো ই পুৰুষ আৰু মহিলা দুয়োকে আৰোপ কৰা লিংগ গতানুগতিকতাৰ পৰা মুক্ত কৰে। নাৰীবাদক পুৰুষৰ বিৰুদ্ধে বুলি গণ্য কৰা উচিত নহয় কিয়নো মই মোৰ অধিকাৰ বিচাৰিলে ই আপোনাক আপোনাৰ অধিকাৰৰ পৰা বঞ্চিত নকৰে।

শেষত ক’ব খোজো, এতিয়াও বহু বাট বাকী নাৰীবাদৰ ইতিবাচক দিশ সকলোৱে বুজি উঠিবলৈ। লিংগ গতানুগতিকতাবোৰে মহিলাসকলৰ সম্পূৰ্ণ মূল্য প্ৰাপ্ত কৰাত নিৰন্তৰ ভাৱে প্ৰতিৰোধক হিচাপে কাম কৰি আহিছে। এখন সমাজ হিচাপে, আমি সদাই বৈষম্যক এক সমস্যা হিচাপে অনুভৱ কৰি আহিছো যি মহিলাসকলক কঠোৰভাৱে সকলোতে বাধা দি আহিছে, কিন্তু বহুলোক হয়তো এতিয়াও বহল ছবিখন চাবলৈ সাজু নহয়।