ওড়িশাত কাউন্সিলাৰ হিচাপে জীৱন আৰম্ভ কৰা এগৰাকী জনজাতীয় নেত্ৰী এতিয়া দেশৰ ১৫ সংখ্যক নিৰ্বাচিত ৰাষ্ট্ৰপতি। যোৱাকালি ২০২২ চনৰ ২১ জুলাইত ৰাষ্ট্ৰপতি নিৰ্বাচনত জয়লাভ কৰাৰ পিছত দ্ৰৌপদী মূৰ্মু ভাৰতৰ প্ৰথমগৰাকী জনজাতীয় মহিলা ৰাষ্ট্ৰপতি হোৱাৰ বিপৰীতে এই পদত অধিষ্ঠিত হোৱা দ্বিতীয়গৰাকী মহিলা ৰাষ্ট্ৰপতি। ঝাৰখণ্ডৰ প্ৰাক্তন ৰাজ্যপাল তথা ভাৰতীয় জনতা পাৰ্টিৰ নেতৃত্বত ৰাষ্ট্ৰীয় গণতান্ত্ৰিক মিত্ৰজোঁটৰ ৰাষ্ট্ৰপতি পদৰ প্ৰাৰ্থী দ্ৰৌপদী মূৰ্মু বিৰোধী প্ৰাৰ্থী যশৱন্ত সিনহাৰ বিৰূদ্ধে সহজে জয়লাভ কৰে । দ্ৰৌপদী মূৰ্মু এগৰাকী মৃদুভাষী নেত্ৰী যিয়ে নিজৰ নিৰ্মল কঠোৰ পৰিশ্ৰমেৰে ওড়িশাৰ ৰাজনীতিত নিজৰ স্থান দখল কৰিছিল।

দ্ৰৌপদী মূৰ্মু ১৯৫৮ চনৰ ২০ জুনত ওড়িশাৰ ময়ুৰভঞ্জ জিলাৰ উপৰবেদা গাৱঁত জন্মগ্ৰহণ কৰিছিল তেওঁৰ দেউতাক পঞ্চায়তী ৰাজ ব্যৱস্থাৰ অধীনত গাওঁবুঢ়া আছিল।

শিক্ষা জীৱন

দেশৰ অন্যতম দুৰ্গম আৰু অনন্নত জিলা ময়ুৰভঞ্জৰ পৰা অহা দ্ৰৌপদী মূৰ্মু ভুৱনেশ্বৰৰ ৰামাদেৱী মহিলা মহাবিদ্যালয়ৰ পৰা কলা শাখাত স্নাতক ডিগ্ৰী সম্পূৰ্ণ কৰে । ইয়াৰ পিছতে ওড়িশা চৰকাৰৰ জলসিঞ্চন আৰু শক্তি বিভাগত কনিষ্ঠ সহায়িকা হিচাপে কাৰ্যনিৰ্বাহ কৰিছিল আৰু ৰাইৰাংপুৰৰ শ্ৰী ঔৰোবিন্দো অখণ্ড শিক্ষা কেন্দ্ৰতো সন্মানীয় সহকাৰী শিক্ষয়িত্ৰী আছিল ।

ব্যক্তিগত জীৱন

ভাৰতৰ ৰাষ্ট্ৰপতি হিচাপে নিৰ্বাচিত দ্ৰৌপদী মূৰ্মুৱে জীৱনৰ কেইবাটাও ব্যক্তিগত শোকজনক ঘটনা অতিক্ৰম কৰিছে। দ্ৰৌপদী মূৰ্মুৱে শ্যাম চৰণ মুৰ্মুৰ সৈতে বিবাহপাশত আবদ্ধ হয় আৰু পিছলৈ দুজন পুত্ৰ আৰু এগৰাকী কন্যা সন্তানৰ জন্ম হয় । তথ্য অনুসৰি ২০০৯ চনত তেওঁৰ এজন পুত্ৰ লক্ষ্মণ মূৰ্মু (২৫)ৰ মৃত্যু হয় ।কিছু বছৰৰ পিছত ২০১২ চনত তেওঁৰ দ্বিতীয় পুত্ৰই এক পথ দুৰ্ঘটনাত মৃত্যুবৰণ কৰে। আকৌ তাৰ দুবছৰৰ পাছত হৃদযন্ত্ৰ বন্ধ হৈ  স্বামীৰ মৃত্যুত আন এক ব্যক্তিগত ক্ষতিৰ সন্মুখীন হ’বলগীয়া হয় ।

গ্লেমাৰ আৰু প্ৰচাৰৰ পৰা আঁতৰি থকা দ্ৰৌপদী মূৰ্মু ব্ৰহ্ম কুমাৰীসকলৰ ধ্যান কৌশলৰ তীক্ষ্ণ অনুশীলনকাৰী। ২০০৯ চনৰ পৰা ২০১৫ চনলৈকে ছয় বছৰৰ ভিতৰত স্বামী, দুজন পুত্ৰ, মাতৃ আৰু ভাতৃক হেৰুৱাই পেলোৱাৰ সময়ত তেওঁ গভীৰ আধ্যাত্মিকতা আৰু চিন্তাধাৰা গ্ৰহণ কৰিছিল। ২০১৬ চনৰ ফেব্ৰুৱাৰী মাহত দূৰদৰ্শনক দিয়া এক সাক্ষাৎকাৰত তেখেতে নিজৰ জীৱনৰ লগত জড়িত সংগ্ৰামৰ বিষয়ে কয় যে ২০০৯ চনত তেওঁ নিজৰ পুত্ৰক হেৰুৱাই বিধ্বস্ত হৈ পৰিছিল আৰু ডিপ্ৰেছনত ভুগি আছিল । ব্ৰহ্ম কুমাৰীসকলক লগ কৰিবলৈ গই বুজিল যে তেওঁ নিজে আগবাঢ়ি যাব লাগিব।

ৰাজনৈতিক জীৱন

দ্ৰৌপদী মূৰ্মুৱে ১৯৯৭ চনত ভাৰতীয় জনতা পাৰ্টীত যোগদান কৰি ৰাইৰাংপুৰ নগৰ পঞ্চায়তৰ কাউন্সিলাৰ হিচাপে নিৰ্বাচিত হয় । ২০০০ চনত ৰাইৰাংপুৰ নগৰ পঞ্চায়তৰ অধ্যক্ষ হোৱাৰ লগতে বিজেপি অনুসূচিত জনজাতি মৰ্চাৰ ৰাষ্ট্ৰীয় উপ-সভানেত্ৰী হিচাপেও কাৰ্যনিৰ্বাহ কৰিছিল । তেওঁ ২০১৫ চনৰ ১৮ মে’ত ঝাৰখণ্ডৰ ৰাজ্যপাল হিচাপে শপত গ্ৰহণ কৰি ঝাৰখণ্ডৰ প্ৰথমগৰাকী মহিলা ৰাজ্যপাল হিচাপে পৰিগণিত হয় আৰু ভাৰতীয় ৰাজ্যৰ ৰাজ্যপাল হিচাপে নিযুক্তি লাভ কৰা ওড়িশাৰ প্ৰথমগৰাকী মহিলা জনজাতীয় নেত্ৰী আছিল । ১৯৯৭ চনত ৰাইৰাংপুৰ অধিসূচিত এলেকা পৰিষদত কাউন্সিলাৰ হিচাপে নিযুক্তি লাভ কৰাৰ লগতে ২০০০ চনৰ পৰা ২০০৪ চনলৈ ওড়িশাৰ বিজেডি-বিজেপি মিত্ৰজোঁটৰ চৰকাৰতো মন্ত্ৰী আছিল। দ্ৰৌপদী মূৰ্মুৱে ২০১৪ চনৰ বিধানসভা নিৰ্বাচনত ৰাইৰাংপুৰৰ পৰা প্ৰতিদ্বন্দ্বিতা কৰিছিল যদিও বিজেডিৰ এজন প্ৰাৰ্থীৰ হাতত পৰাস্ত হৈছিল। ঝাৰখণ্ডৰ ৰাজ্যপাল হিচাপে কাৰ্যকাল সম্পূৰ্ণ কৰাৰ পিছত ৰাইৰাংপুৰত তেওঁ ধ্যান আৰু সমাজসেৱাৰ বাবে সময় উচৰ্গা কৰিছিল। ২০১৫ চনত ঝাৰখণ্ডৰ ৰাজ্যপাল হিচাপে নিযুক্তি লাভ কৰি ২০২১ চনলৈকে এই পদত অধিষ্ঠিত হৈছিল। ২০১৭ চনত ঝাৰখণ্ডৰ ৰাজ্যপাল হিচাপে দ্ৰৌপদী মূৰ্মুৱে ঝাৰখণ্ডৰ বিধানসভাই অনুমোদন জনোৱা বিধেয়কখনত সন্মতি দিবলৈ অস্বীকাৰ কৰিছিল, বিধেয়কখনে জনজাতীয় লোকসকলক তেওঁলোকৰ মাটিৰ বাণিজ্যিক ব্যৱহাৰৰ অধিকাৰ প্ৰদান কৰাৰ লগতে মাটিৰ মালিকীস্বত্ব যাতে সলনি নহয় তাৰ প্ৰতি লক্ষ্য ৰাখিছিল ।

২০২২ চনৰ জুন মাহত বিজেপিৰ নেচনেল ডেম’ক্ৰেটিক এলায়েন্সৰ ২০২২ চনৰ নিৰ্বাচনৰ বাবে ভাৰতৰ ৰাষ্ট্ৰপতি পদৰ প্ৰাৰ্থীয়ে দ্ৰৌপদী মূৰ্মুক মনোনীত কৰে। ৰাইৰাংপুৰৰ পৰাই তেওঁ বিজেপিৰ সৈতে ৰাজনৈতিক জখলাত প্ৰথম পদক্ষেপ গ্ৰহণ কৰে । ৰাষ্ট্ৰপতি পদৰ প্ৰাৰ্থী হিচাপে নিৰ্বাচিত হোৱাৰ পিছত তেওঁ স্তম্ভিত আৰু সুখী। ময়ুৰভঞ্জ জিলাৰ এগৰাকী জনজাতীয় মহিলা হিচাপে তেওঁ কেতিয়াও শীৰ্ষ পদৰ প্ৰাৰ্থী হোৱাৰ কথা ভবা নাছিল।

দ্ৰৌপদী মূৰ্মুৱে, ২০০৭ চনত ওড়িশা বিধানসভাই বছৰৰ শ্ৰেষ্ঠ বিধায়কৰ নীলকান্ত বঁটা প্ৰদান কৰিছিল। ওড়িশা চৰকাৰৰ পৰিবহণ, বাণিজ্য, মীন আৰু পশুপালনৰ দৰে মন্ত্ৰালয়সমূহ চম্ভালিব পৰাৰ প্ৰশাসনিক অভিজ্ঞতা তেওঁৰ বৈচিত্ৰময় আছে । অহা ২৫ জুলাইত দ্ৰৌপদী মূৰ্ময়ে ৰাষ্ট্ৰপতি পদৰ শপত গ্ৰহণ কৰিব ।