অৰুণাচল প্ৰদেশৰ পশ্চিম কামেং জিলাত বসবাস কৰা শেৰদুকপেন জনগোষ্ঠীৰ এক গুৰুত্বপূৰ্ণ পৰম্পৰাগত উৎসৱ হৈছে ক্ৰ’–চেইক’ৰ (Kro-Chekor)। ধৰ্মীয় বিশ্বাস, কৃষিজীৱন, সামাজিক ঐক্য আৰু সাংস্কৃতিক পৰম্পৰাৰ এক সুন্দৰ সমন্বয় এই উৎসৱ। সাধাৰণতে চন্দ্ৰ পঞ্জিকা অনুসৰি মে’–জুন মাহৰ ভিতৰত এই উৎসৱ পালন কৰা হয়। ক্ৰ’–চেইক’ৰ উৎসৱৰ মূল উদ্দেশ্য হৈছে ভাল শস্য উৎপাদন, সমাজৰ সামগ্ৰিক মংগল আৰু গাঁওবাসীক অশুভ শক্তিৰ পৰা ৰক্ষা কৰা। শেৰদুকপেনসকলৰ বিশ্বাস অনুসৰি, এই ধৰ্মীয় আচাৰ-অনুষ্ঠানৰ জৰিয়তে শস্য আৰু গাঁওবাসীৰ ওপৰত অশুভ শক্তিৰ প্ৰভাৱ দূৰ কৰি সমৃদ্ধি আৰু শান্তি কামনা কৰা হয়।

উৎসৱৰ প্ৰস্তুতি এমাহ আগৰ পৰাই

ক্ৰ’–চেইক’ৰ উৎসৱৰ প্ৰস্তুতি মূল উৎসৱৰ প্ৰায় এমাহ আগৰ পৰাই আৰম্ভ হয়। ইয়াৰ ভিতৰত বিশেষ গুৰুত্ব লাভ কৰে বৌদ্ধ ধৰ্মগ্ৰন্থৰ পবিত্ৰ পাঠ। মূল উৎসৱৰ প্ৰায় ১৫ দিন আগৰ পৰাই এই ধৰ্মগ্ৰন্থ পাঠৰ কাৰ্যসূচী আৰম্ভ হয় আৰু পূৰ্ণিমাৰ দিনা মূল উৎসৱ অনুষ্ঠিত হয়। প্ৰতি বছৰে গাঁও পৰিষদে গাঁৱৰ জ্যেষ্ঠ লোকসকল আৰু গাঁৱৰ প্ৰধান ভিক্ষুক আমন্ত্ৰণ কৰি কোনখন পবিত্ৰ ধৰ্মগ্ৰন্থ পাঠ কৰা হ’ব সেই বিষয়ে আলোচনা কৰে। গাঁওবাসী আৰু ভিক্ষুৰ সন্মতিৰ ভিত্তিত ধৰ্মগ্ৰন্থ নিৰ্বাচন কৰা হয়।

এই পবিত্ৰ সময়ছোৱাত গাঁওখনত চিকাৰ আৰু মাছ ধৰা সম্পূৰ্ণৰূপে বন্ধ থাকে। কোনো ব্যক্তিয়ে এই নিয়ম উলংঘা কৰিলে গাঁও পৰিষদৰ নিয়ম অনুসৰি জৰিমনা বিহা হয়। গাঁওবাসীয়ে এই পৰম্পৰা অতি নিষ্ঠাৰে পালন কৰে।

গাঁও পৰিষদ আৰু ‘কাচুং’ৰ ভূমিকা

উৎসৱৰ সময়ছোৱাত গাঁওখনৰ কাম-কাজ সুচাৰুৰূপে চলাই নিয়াৰ বাবে গাঁও পৰিষদে প্ৰতিটো গোষ্ঠীৰ পৰা চাৰিটা পৰিয়ালৰ লোকক ‘কাচুং’ (Kachung) হিচাপে মনোনীত কৰে। তেওঁলোকে পাল পাতি উৎসৱৰ বিভিন্ন কাম-কাজ সম্পন্ন কৰে।খাদ্য প্ৰস্তুত কৰাৰ পৰা আৰম্ভ কৰি ধৰ্মীয় পাঠ আৰু অন্যান্য আয়োজনলৈকে উৎসৱৰ সময়ছোৱাত প্ৰয়োজনীয় বিভিন্ন কামত কাচুংসকলে গুৰুত্বপূৰ্ণ ভূমিকা পালন কৰে। আনহাতে, ধৰ্মগ্ৰন্থ পাঠৰ কাৰ্যসূচী সম্পূৰ্ণ নোহোৱা পৰ্যন্ত ভিক্ষুসকলে গুম্ফাত থাকি ধৰ্মীয় আচাৰ-অনুষ্ঠান সম্পন্ন কৰে।

ঐক্য আৰু সহযোগিতাৰ অনন্য নিদৰ্শন

ক্ৰ’–চেইক’ৰ উৎসৱ শেৰদুকপেন সমাজৰ ঐক্য আৰু সহযোগিতাৰ এক সুন্দৰ প্ৰতিচ্ছবি। উৎসৱৰ বাবে প্ৰয়োজনীয় সামগ্ৰী আৰু অন্যান্য ব্যৱস্থাৰ ক্ষেত্ৰত গাঁওবাসীয়ে গাঁও পৰিষদে নিৰ্ধাৰণ কৰা ধৰণে নিজ নিজ সামৰ্থ্য অনুসৰি সহযোগিতা আগবঢ়ায়। এই সমূহীয়া অংশগ্ৰহণেই উৎসৱটোক কেৱল ধৰ্মীয় অনুষ্ঠানৰ মাজতে সীমাবদ্ধ নাৰাখি এক বৃহৎ সামাজিক আৰু সাংস্কৃতিক উৎসৱলৈ পৰিণত কৰিছে।

যুৱসমাজৰ বিশেষ ভূমিকা

ক্ৰ’–চেইক’ৰ উৎসৱত শেৰদুকপেন যুৱসমাজৰ ভূমিকাও যথেষ্ট গুৰুত্বপূৰ্ণ। প্ৰতিটো গোষ্ঠীৰ নিজা ‘ব্লাং’ (Blang) নামৰ ঘৰ থাকে, য’ত বিভিন্ন বয়সৰ যুৱক-যুৱতীসকলে একেলগে থাকি উৎসৱৰ প্ৰস্তুতি আৰু উদযাপনত অংশগ্ৰহণ কৰে। ব্লাংৰ কাম-কাজৰ দায়িত্ব লোৱা জ্যেষ্ঠ যুৱকজনক ‘ব্লাং-পু জোন্নো’ (Blang-poo Jonno) আৰু জ্যেষ্ঠ যুৱতীগৰাকীক ‘ব্লাং-পু জোমজি’ (Blang-poo Jomji) বুলি কোৱা হয়।

যুৱক-যুৱতীসকলে এমাহৰো অধিক সময় নিজ নিজ ঘৰৰ পৰা আঁতৰি থাকি ব্লাংৰ বিভিন্ন কাম-কাজ সম্পন্ন কৰে। উৎসৱৰ অন্যতম গুৰুত্বপূৰ্ণ অংশ ‘ফাক’ (Phak) অৰ্থাৎ স্থানীয়ভাৱে প্ৰস্তুত কৰা পৰম্পৰাগত পানীয় প্ৰস্তুত কৰাতো তেওঁলোকৰ বিশেষ ভূমিকা থাকে।

মূল উৎসৱৰ দিনা পবিত্ৰ শোভাযাত্ৰা

ক্ৰ’–চেইক’ৰ উৎসৱৰ মূল দিনটোত পবিত্ৰ ধৰ্মগ্ৰন্থ এক বিশেষ শোভাযাত্ৰাৰে কঢ়িয়াই নিয়া হয়। এই শোভাযাত্ৰাত মুখা পৰিধান কৰা লোক, পতাকা বহন কৰা লোক আৰু ভিক্ষুসকলে অংশগ্ৰহণ কৰে। ঢোল আৰু বিভিন্ন পৰম্পৰাগত বাদ্যযন্ত্ৰৰ ধ্বনিৰে সমগ্ৰ পৰিৱেশ মুখৰিত হৈ পৰে।উৎসৱৰ সময়ত পৰিৱেশন কৰা পৰম্পৰাগত নৃত্যসমূহৰ মাজেৰে অশুভ শক্তিৰ ওপৰত শুভ শক্তিৰ জয়ৰ প্ৰতীকী বাৰ্তা প্ৰকাশ কৰা হয়।

সমৃদ্ধি আৰু মংগলৰ কামনা

ক্ৰ’–চেইক’ৰ শেৰদুকপেন জনগোষ্ঠীৰ বাবে কেৱল এটা উৎসৱ নহয়; ই তেওঁলোকৰ ধৰ্মীয় বিশ্বাস, কৃষিভিত্তিক জীৱন, সামাজিক ঐক্য আৰু সাংস্কৃতিক পৰিচয়ৰ এক গুৰুত্বপূৰ্ণ অংশ।গভীৰ বিশ্বাস আৰু আনন্দ-উৎসাহেৰে পালন কৰা এই উৎসৱৰ জৰিয়তে শেৰদুকপেনসকলে ভাল শস্য, শান্তি, সমৃদ্ধি আৰু সমাজৰ সামগ্ৰিক মংগলৰ বাবে আশীৰ্বাদ কামনা কৰে। প্ৰজন্মৰ পিছত প্ৰজন্ম ধৰি চলি অহা এই পৰম্পৰাই অৰুণাচল প্ৰদেশৰ বৈচিত্ৰ্যময় জনজাতীয় সংস্কৃতিক আৰু অধিক সমৃদ্ধ কৰি তুলিছে।