পবিত্ৰ কুমাৰ ডেকা অসমৰ এগৰাকী প্ৰসিদ্ধ চলচ্চিত্ৰ আৰু সাংস্কৃতিক সাংবাদিক, স্তম্ভলেখক, প্ৰকাশক, সম্পাদক, চলচ্চিত্ৰ সমালোচক আৰু চিত্ৰনাট্যকাৰ আছিল। আশীৰ দশকত তেখেতে আৰম্ভ কৰা ৰূপকাৰ নামৰ সাংস্কৃতিক আলোচনীখনে অসমত পেচাদাৰী চলচ্চিত্ৰ-সাংবাদিকতাৰ আধাৰ স্থাপন কৰে।

জীৱনৰ শেষ পৰ্যন্ত পবিত্ৰ কুমাৰ ডেকাই অসম চিনে-জাৰ্ণেলিষ্ট সংস্থাৰ সভাপতি হিচাপে কৰ্ম সম্পাদন কৰিছিল। অসমীয়া চলচ্চিত্ৰৰ সাতদশকীয়া ইতিহাস সমাহাৰ কৰা ‘অসমীয়া চলচ্চিত্ৰ’ নামৰ গ্ৰন্থখন তেখেতৰ অত্যন্ত মূল্যৱান কৃতিসমূহৰ ভিতৰটো অন্যতম।

সূৰ্য তেজৰ অন্য নাম, হস্তীৰ কন্যা, জখম, ধনীৰামৰ ধন আদিৰ দৰে বহুতো চলচ্চিত্ৰ আৰু ধাৰাবাহিকৰ চিত্ৰনাট্য তেখেতে ৰচনা কৰিছে। আনহাতে, হালধীয়া চৰায়ে বাওধান খায় সহ কিছুমান উল্লেখযোগ্য অসমীয়া চলচ্চিত্ৰত অভিনয়ো কৰিছিল।

অল ইণ্ডিয়া ৰেডিঅ’ গুৱাহাটী কেন্দ্রৰ বাবে পবিত্ৰ কুমাৰ ডেকাই মৃণাল সেন, ভবেন্দ্ৰ নাথ শইকীয়া আদিৰ দৰে খ্যাতনামা চলচ্চিত্ৰসৃষ্টিকাৰসকলৰ সাক্ষাৎকাৰ গ্ৰহণৰ সুযোগ লাভ কৰিছিল।১৯৮৮ চনত তেখেত ইষ্টাৰ্ণ ইণ্ডিয়া চলচ্চিত্ৰ সন্থাৰ শ্ৰেষ্ঠ চলচ্চিত্ৰ সমালোচক বঁটা লাভ কৰে। তেখেতৰ মৃত্যু পরৱৰ্তীকালত, ২০১০ চনৰ পৰা অসম চৰকাৰে তেখেতৰ নামত ৰাজ্যিক শ্ৰেষ্ঠ চলচ্চিত্ৰ সমালোচক বঁটা প্ৰদান আৰম্ভ কৰে।

১৯৬৫ চনত পবিত্ৰ কুমাৰ ডেকাই গুৱাহাটীস্থিত আছাম ট্ৰিবিউন সংবাদ গোটত বিজ্ঞাপন প্ৰবন্ধক হিচাপে কাৰ্যজীৱন আৰম্ভ কৰে। তাৰ পিছত তেওঁ সাদিন-প্ৰতিদিনত স্থানান্তৰিত হয় আৰু জীৱনৰ শেষদিনলৈ সেই প্ৰতিষ্ঠানতেই কর্মৰত থাকে। এই সময়ছোৱাত ডেকাই বহুতো সামাজিক গল্প, উপন্যাস আৰু কল্পবিজ্ঞানভিত্তিক সাহিত্য সৃষ্টি কৰাৰ লগতে বহুবোৰ গ্ৰন্থ অনুবাদো কৰিছিল।

১৯৭৫ চনৰ পৰা তেওঁৰ মনোযোগ লাহে লাহে সাহিত্যৰ পৰা চলচ্চিত্ৰ আৰু থিয়েটাৰজগতলৈ আহি পৰে। এই সময়ত তেওঁ ৰূপকাৰ নামৰ এখন ছবি-সাংস্কৃতিক আলোচনী প্ৰকাশ আৰু সম্পাদনা আৰম্ভ কৰে।তেওঁৰ সম্পূৰ্ণ নিজৰ প্ৰচেষ্টাত প্ৰকাশ কৰি উলিয়াইছিল 'ৰূপকাৰ' নামৰ সাংস্কৃতিক বিষয়ক আলোচনীখন ৷ ৰূপকাৰ ১৯৯০ চনৰ আৰম্ভণিলৈকে নিয়মিতভাৱে প্ৰকাশ পাইছিল।ভিন্ন কাৰণত ৯০ দশকৰ মাজভাগত ‘ৰূপকাৰ’ ৰ প্ৰকাশ বন্ধ হৈ পৰে ।

তেওঁ অসমৰ ভ্ৰাম্যমাণ থিয়েটাৰৰ সৈতে গভীৰভাৱে জড়িত আছিল। তেওঁ ঠিকনা, ৰাজদ্ৰোহী, অভাৰকোট, নাগিনীৰ অমৃত দংশন, ET (ষ্টিভেন স্পিলবাৰ্গৰ চলচ্চিত্ৰৰ অভিযোজন), লাইলা মাজনু, ড° বেজবৰুৱা, আৰু গডফাদাৰ (ফ্ৰান্সিছ কপোলাৰ ছবিৰ অভিযোজন) আদিৰ দৰে কেইবাখনো নাটক ৰচনা কৰিছিল। এই নাটকসমূহ কহিনুৰ থিয়েটাৰ, হেঙুল থিয়েটাৰ, ৰাজশ্ৰী থিয়েটাৰ, শংকৰদেৱ থিয়েটাৰ, আৰু বৰদৈচিলা থিয়েটাৰ আদি প্ৰতিষ্ঠানসমূহৰ দ্বাৰা পৰিৱেশন কৰা হৈছিল। ২০১০ চনৰ ৫ জানুৱাৰীত পবিত্ৰ কুমাৰ ডেকাই হৃদৰোগত আক্ৰান্ত হৈ গুৱাহাটীৰ জিএনআৰচি চিকিৎসালয়ত মৃত্যু হয়।